| King's profileآهـاتBlogLists |  Tools  Help |
|
30 May لوحــــــتيصبــاح الخيــر
 أعتذر عن تأخري في تحديث السبيس ، ظروف وانشغالات ... الحمدلله خفت
عاد حبيت اعتذر لصديقيني الكثيرين اللي منتظرين التحديثات بأحر من الجمر خصوصاً أن لي متابعين كثيرين مرة أكثر من متابعين موقع ميكروسوفت
< قم بس
 وبهالمناسبة جبت لكم شي خطير جداً جداً
من خطورته أول ما شفته سويت كذا
بعد هالمقدمة < الله من زين المقدمة
أبي أعرفكم على هالشي الخطير مرة مرة واللي كلكم متحمسين تبون تعرفون وش هو لوحة رسمتها بنت مبدعة يسمونها ملكة الفن التشكيلي
ويقارنونها بفان جوخ وبيكاسو بس هي تطق اصبع لهم
الفنانة الخطيرة هذي اسمها ( بقايا انتظار )
واللوحة لخشتي أنا يومني وغيد
 بالطقم الرسمي طبعاً أقول لـ بقايا ألف ألف شكر على تفضلك بهالرسمة الحلوة
اللي مااقدر أعبر عن روعتها ودقتها وفرحتي فيها ..
ما أطول عليكم
هذي هي الرسمة الخيالية للمبدعة بقايا انتظار
وش رايكم في هيك إبداع .. ؟
وأقصد بالإبداع هو إبداع الرسم موب خشتي
لاحد يقول وش كنت تاكل
تراي مانيب تفخ بس الصورة مطلعتني كذا
سياو على قولة بعض الناس اللي عجزت افهمه انها تشاو
<< ابد منيب اقصد R O M A 06 April سواليف خاثرةسالفة (1)
أشين شي بالعالم انك تتابع مباراة وعندك بنت
 أو بزر  لا حد يجي مدرعم ويقول اني عنصري او مضطهد للمرأة
بس الواحد يشوف المباراة عادة وهو في احدى حالتين ، اما متحمس ومشدود مع المباراة ومايبي احد يخرب عليه واللي يحاكيه خطرن يهبده بالطفاية على دمجته .. والنوع الثاني يجيك مروق ويمزمز شاهي ويبي يطالع ويحلل وهو مرتاح مايبي احد يجي يقرق عندهادري ان البنت امي واختي وجدتي وبنت جيراننا وشغالتنا بعد لكن المراد ان اكثرهن قلق الله يصلحهن
واذا طالعت المباراة يشغلونك من هو هاللاعب وش اسمه المباراة بين من ومن كم النتيجة الى اخر هاللقافة اما البزر يجيك مدرعم موب فاهم شي وبكل لكاعة يقول انا اشجع الفريق الازرق  ،، ساعتها ودك ان اللاب توب جنبك عشان ترنه على جبهته <<<< يالمجرم  مايستفاد من هذه السالفة:
- لاحد يشوف مباريات <<<<< ابو الذهانة ياشيخ
.
.
.
.
سالفة (2)
وحدة من بنات اخواني البزارين فيها رجة ميب طبيعية
المهم من رجتها ما يمر يوم الا براسها فلقة او صعرورة ولا طايحة من مكان ولا منكب عليها شي حار .. يعني مثل ما قلت لكم رجة غير طبيعية العيال مافيهم كذا ... المهم اخر شي صار لها شي يروع .. انقفل عليها الباب وانقطع اصبعها and I mean it literally انقطع فعلياً
بس اشوى ما ضاع حصلوه وسووا لها عملية ورجعوا المصبع المشكلة من سباهتها بعد يومين جاية تقول لي: عمو ترا اصبعي طاح  بشري ام امك طيب ... طبعاً انا ما صدقت خبر وقلت اجيب لكم صورة مايستفاد من هذه السالفة:
- كل واحد يخلي بالوه من لغاليغوه
.
.
.
.
سالفة (3)
وانا باحد السبيسات حصلت اختبار لقدرة الشخص في اللغة الانجليزية (الرابط للي يبي):
عاد بما اني ارطن انجلش بطلاقة لدرجة اني اتكلم من اليسار لليمين
قلت خل اشوف قدرتي اللغوية ورحت سويت الاختبار ،، وابشركم خذت المستوى السادس من سبع مستويات ،، ولزقوا لي نجمة على جبهتي وكتبوا جنبه (هذا المستخدم يفت انجليزي) << عاد ذي نصبة << يقال لك النجمة مهيب نصبة .. وهذي النتيجة سويت لها برنت سكرين للي يحسبني زلابة في الانجليزي، وناوي اطبعها واقدم بها على وظيفة سكيورتي << طيب دامك فاقشها فاقشها قل وظيفة تسوى :.
.
.
.
سالفة (4)
من كم اسبوع حطيت اعلان بموقعي عن القرين كارد ، اللي هو للي مايعرفه مثل الجواز الأمريكي بس موب جواز جواز ، يعني تصير شبه أمريكي
تقدر تدخل امريكا متى مابغيت بدون فيزا وغيرها وتشتغل في امريكا ومادري ايش بس عاد مدري لك حق الانتخاب ولا لا .. المهم قلت ياولد ورا ماتصير امريكاني وتجحد ربعك، وبحكم اني وفي لوطني رحت قدمت على هالقرين كارد موب تنكر لبطاقة الأحوال الحبيبة بس عشان اعرف وش انتي يالقرين كارد ووش تصيرين من لحية بعد كم يوم دقت علي وحدة امريكانية وقالت انت آهات بن فلان الفلاني قلت الله الله قالت ونعم قلت ماعليك زود << ابوك من فقش المهم جت تبي تسحبني وتبيني اعطيها رقم الكريديت كارد قلت معصيـ (ة)
ورحت سجلت وحطيت رقم الفيزا من النت اضمن لي .. بعد حوالي الاسبوعين كلمتني خويتها وقالت لي انت آهات بن فلان الفلاني قلت الله الله قالت ونعم قلت ماعليك زود << اختصر ورانا اشغال << طيب .. قالت انت مقدم على قرين كارد قلت ايه قالت آر يو فروم ساودي أرابيا؟ قلت افا علييييك .. قالت ووندرفول .. انا خقيت يوم قالتها المهم جلست نص ساعة ترطن علي والزبدة تبيني ادفع مبلغ اضافي عشان تزود فرصي بالفوز بالقرين كارد عاد انا قمت الف وادور وهاه الكريديت كارد ميب عندي ومرة اقول مهيب مفعلة من البنك وهي تقول طيب خل نجرب سوا بهاللحظة انا خقيت واحسبها تبي بطاقة سوا << مخه ميد ان ساودي اخرتها قطيتها كاش وقلت لا يكثر dont more it وشوي قفلت السماعة بوجهي عاد انا خنقتني العبرة وقلت وشلون امريكية تقفل السماعة بوجهي ونويت ادق عليها بس اشوى جوالي كان استقبال << ياخي استح ماحناب بزران تهك علينا مايستفاد من هذه السالفة:
- لاحد يكلم بنات الا سعوديات بس <<< انواع التدشير
((((
))))
((((
\\
//
\\
<<<<< واحد متأثر بالتشات الصوتي
أتمنى ان سوالفي الخاثرة جازت لكم << قم بس
 13 March نـــ ز ا ر يـــ ا ت مازلت تسألني عن عيد ميلادي !؟
سجل لديك إذن ما أنت تجهله ..
تاريخ حبك لي تاريخ ميلادي ! حبك ياعميقة العينين .. تطرف .. تصوف .. عبادة .. حبك مثل الموت والولادة .. صعب بأن يعاد مرتين ..! ذات العينين السوداوين .. ذات العينين الصاحيتين الممطرتين .. لا اطلب أبداً من ربي إلا شيئين أن يحفظ هذين العينين .. ويزيد بأيامي يومين .. كي أكتب شعراً في هاتين اللؤلؤتين ..! ::
أخاف أن تمطر الدنيا ولست معي
فمنذ رحت ِ وعندي عقدة المطر ِ كان الشتاء يغطيني بمعطفه فلا أفكر في برد ولا ضجر ِ وكانت الريح تعوي خلف نافذتي فتهمسين (تمسـّك) هاهنا شعري والآن أجلس والأمطار تجلدني على ذراعي على وجهي على ظهري فمن يدافع عني يا مسافرة .. مثل اليمامة بين العين و البصر ِ وكيف أمحوك من أوراق ذاكرتي ؟ وأنت في القلب مثل النقش في الحجر ِ أنا احبك يامن تسكنين دمي إن كنتِ في الصين .. أو إن كنتِ في القمر ِ ::
أيتها الأنثى التي في صوتها
تمتزج الفضة .. بالنبيذ .. بالأمطار ومن مرايا ركبتيها يطلع النهار ويستعد العمر للإبحار أيتها الأنثى التي ..
يختلط البحر بعينيها مع الزيتون يا وردتي .. ونجمتي .. وتاج رأسي .. ربما أكون .. مشاغبا .. أو فوضوي الفكر .. أو مجنون إن كنت مجنوناً -وهذا ممكن-
فأنت يا سيدتي مسؤولة عن ذلك الجنون! أو كنت ملعوناً -وهذا ممكن- فكل من يمارس الحب بلا إجازة .. في العالم الثالث .. يا سيدتي .. ملعون فسامحيني مرة واحدة ..
إذا انا خرجت عن حرفية القانون فما الذي أصنع يا ريحانتي ؟ إن كنت ِ قد أصبحت ِ لي نصاً من القانون ::
أتحدى ..
من إلى عينيك يا سيدتي ، قد سبقوني .. يحملون الشمس في راحاتهم .. وعقود الياسمين ِ .. أتحدى كل من عاشرتِهم .. من مجانين ، ومفقودين في بحر الحنين ِ .. أن يحبوك بأسلوبي ، وطيشي ، وجنوني .. أتحدى ..
كتب العشق .. ومخطوطاته .. منذ آلاف القرون ِ .. أن تري فيها كتابا واحدا .. فيه يا سيدتي ، ما ذكروني .. أتحداك أنا .. أن تجدي .. وطناً مثل فمي .. وسريراً دافئاً .. مثل عيوني .. أتحداهم جميعاً ..
أن يخطّوا لك ِ مكتوب هوىً كمكاتيب ِ غرامي .. أو يجيؤوك ِ –على كثرتهم- بحروف ٍ كحروفي، وكلام ٍ ككلامي .. أتحداك ِ أنا أن تذكري
رجلاً من بين من أحببتهم أفرغَ الصيف بعينيك ِ .. وفيروزَ البحور أتحدّى مفردات الحب في شتى العصور والكتابات على جدرانِ صيدون وصور فاقرأي أقدم أوراق الهوى .. تجديني دائماً بين السطور إنني أسكنُ في الحب فما من قـُبلة ٍ أخذت .. أو أعطيت ليس لي فيها حلول ٌ أو حضور فارحلي، حيثُ تريدينَ.. ارحلي..
واضحكي .. وابكي .. وجوعي .. فأنا أعرفُ أنْ لنْ تجدي .. موطناً فيهِ تنامينَ كصدري .. ::
يااااا ربي ..
قلبي لم يعد كافياً .. لأن من أحبها تعادل الدنيا .. فضع بصدري واحداً اخراً .. يكون في مساحة الدنيا ..! نزار قباني 03 March يا قلبه الخواف !!كل واحد بالعالم عنده شي يخاف منه ولا يغركم اي واحد يقول انا مااخاف لأنه مهايطي وكان جدتي عندها سالفة فهو عنده سالفة لأن الخوف شعور إنساني طبيعي ... لكن تختلف طبيعة المخاوف من شخص للثاني
فيه ناس يخافون من الموت أو الظلام وناس يخافون من فقدان الأقارب والأصدقاء .. وناس يخافون من الاماكن المرتفعة أو الأماكن المفتوحة وفي ناس يخافون من رؤية الدم (الهيموفوبيا) وناس من الدكاترة والمستشفيات أو الماء أو الوحدة أو الفوضى أو الجن وفي ناس يخافون من الفيران .. ويمكن تكبر الحالة لدرجة أنه فيه ناس يخافون من الخوف نفسه
طبعاً ما نبي نتكلم عن الحالات المرضية ، نبي نتكلم عن الخوف الطبيعي .. وبما أني فاضي اليوم وماعندي شي اسويه .. وش رايكم نتصارح .. وكل واحد يقول الشي اللي يخاف منه ؟
 عشان ما تستحون راح ابدا انا .. واكتب لكم أعدائي اللدودين اللي اخاف منهم للأسف::
العدو رقم 1
 البحر
أعترف أنا آهات إني أخاف من أعماق البحر والمحيطات والموية بشكل عام .. يعني عندي اكوافوبيا
 اوكي الشاطيء روعة وحلو ومنظر البحر يجنن من بعيد بس جوا البحر والمحيطات نفسها رعب بصراحة خاصة بالليل والجو بارد .. يعني مااتخيل نفسي اركب سفينة ابداً .. واعتبر ان الموت غرقاً أشد انواع الموت تعذيب  أكيد البيئة لها دور بما أني من سكان الرياض الحبيبة وعندنا ماشالله شلالات طبيعية  البحر ما نعرفه الا بالسفريات والإجازات .. طبعاً هذا ما هو سبب رئيسي .. السبب الرئيسي مجهول  ::
العدو رقم 2:
 الصراصير
أعترف أنا آهات اني مااداني شي اسمه صراصير .. لحد يضحك لا بالكيبورد
يعني سبحان الله من وانا بزر مااداني الصراصير .. حط عندي اي شي انشالله أسد (مشوها) بس لا تجيب صرصور .. مع اني قريت عنها انها حليلة وعمياء وحتى تنقرف من الانسان لا لمسته تروح تتسبح  بس كذا من الله مااواطنها يلعن امها ...::
العدو رقم 3:
 المستشفى
اعترف أنا آهات إني أكره شي اسمه مستشفى وماداني ريحته .. خصوصاً مستوصفات الأسنان .. ومادري شلون الدكاترة يتحملون العمل اربعة وعشرين ساعة بالمستشفيات
 عموماً اتوقع كثير منكم مثلي .. وهالشي تقدرون تسمونه خوف أو كره بكيفكم ..::
يلله علمونا وش انتم تخافون منه ..  25 February الجاثوم .. بين الحقيقة والوهم
أكيد سمعتوا بكلمة الجاثوم ، أو مر عليكم هالمصطلح في سواليف عابرة على الأقل ، ويمكن عانيتوا من هالتجربة القاسية مرة أو مرتين ،، أو لكم صراعات مستمرة معها كل فترة .. عموماً محاكيكم -اللي هو انا- مرت عليه هالظاهرة أكثر من مرة
..اللي جاب لي فكرة هالبلوق اني كنت اسولف مع وحدة بالمسنجر (هي عارفة نفسها
) وطريت الجاثوم فقالت انها اول مرة تسمع هالمصطلح !! لذا فكرت اسوي بحث مبسط عن الجاثوم ووشو من لحية ،، لاسيما اني مهتم بالظواهر الغريبة أو اللي نسميه علم ماورا الطبيعة (الميتافيزيقيا MetaPhysics).اتوقع كثير منكم الحين يقولون ان (الجاثوم) اسطورة وخرافة يعني خرابيط قديمة المفروض نحترم العقول ومانتكلم فيها ، لكن ارد عليهم واقول ان الجاثوم (حقيقة علمية)! نعم حقيقة علمية بغض النظر عن أسبابها وتفسيراتها لكنها حقيقة علمية ، وذكرت في قاموس ويبستر تحت تعريف:
الجاثوم Incubus : روح شريرة أو شيطان يجثم على صدر المرأة النائمة ليلا فتشعر بما يشبه الاختناق وتفقد القدرة على الحركة وحتى على الكلام والصراخ.
هالتعريف يدل ان الجاثوم مو خرافة أسطورية عربية أو ميثولوجية شعبية .... بل بالعكس هي ظاهرة ميتافيزيقية عالمية ، وأظهرت الدراسات أن 2% من الأشخاص يتعرضون لها مرة في الشهر على الأقل ،، وذكرت في الكثير من الحضارات كحضارة الفايكنج اللي جبت لكم منها هالتعويذة كانوا يستخدمونها للحماية من الجاثوم
 :
كما وردت كلمة جاثوم في قاموس لسان العرب لابن منظور تحت تعريف:
الجثام والجاثوم : الكابوس، يجثم على الإنسان، ويقال للذي يقع على الإنسان وهو نائم "جاثوم".
من هنا نشوف ان كلمة جاثوم بحد ذاتها معناتها شي يجثم على النايم .. وهذا هو exactly اللي يصير .. يكون الشخص نايم .. وفي بداية النوم أو قريب من الصحوة ،، يشوف قدامه خيال أسود ضخم يجي ويقعد فوقه
 ويحاول الشخص انه يتكلم او يتحرك لكن مايقدر لأنه يكون في حالة (شلل تام) بسبب ثقل الجسم اللي جاثم عليه ، وبهالوقت يعاني من آلام وهلوسات مخيفة لفترة بسيطة حتى يروح فجأة ،، وممكن لو رجع نام بسرعة يرجع له نفس الجاثوم ويستقعد له طول الليل ::
التفسير لهالظاهرة على نوعين .. تفسير علمي وتفسير اعتقادي..
التفسير العلمي هو أن الانسان يكون إما توه طلع من طور النوم (الحلم) لطور الصحوة لكن جسمه مازال في حالة إرتخاء عضلات / شلل ،، وبسب خلل معين انتقل لطور الصحوة وعضلاته لازالت مرتخية، فاللي يصير انه يعي اللي قدامه ويشوف لكن جسمه مايتحرك ولا يتكلم ويعاني من هلوسات مرعبة لأن دماغه لازال في طور الحلم .. وفيه تفسير ثاني أنه بخار في مجرى النفس يطلع للدماغ او شحنة كهربائية زائدة بالمخ تمنع التنفس وتخلي الجسم واللسان في حالة شبه شلل وشعور بالرعب.
أما التفسير الميتافيزيقي أو الاعتقادي فيقولون انه إما تلبس للجن أو الشياطين للإنسان ، او مس بسيط غير دائم .. ويمكن يكون عبارة عن روح هائمة أو جني من سكان البيت يحاول يفزع النايم لسبب من الأسباب .. إما إنه قام بإيذائه أو أنه قليل التدين والأذكار وأهمها أذكار النوم، كما يقولون أنه الجن يتلاعبون ويتسلون بالشخص وهو نائم ويخافون بشدة من ذكر الله.
طيب نجي لـ وقائع حصلت إما لي أو لبعض الناس ، وهي تدل أن هالظاهرة حقيقة بشكل لايدع مجال للشك بغض النظر عن تفسيرها العلمي أو الديني ..
::
مرة وانا نايم صحيت قريب الفجر ، يمكن الساعة 3 .. وكان الظلام شديد طبعاً والباب مفتوح شوي يعني فيه نور خفيف .. انا نص نايم واشوف شي اسود كبير مثل اسطوانة الغاز جاي لمي .. وكل شوي يقرب وانا متوقع اني راح اصحى او انه تخيل بس .. وفجأة جلس فوقي
ولا عاد قويت اتكلم او اتنفس واحس بضغط شديد .. ومع القراءة والاذكار اللي استجمعتها بسرعة حسيت الجسم الأسود بدا يطلع فوق وشوي شوي اشوفه طالع ورايح للسقف الين اختفى .. اول ما رجعت للنوم وابو الشباب يطب علي مرة ثانية ونفس الموضوع صراع شديد معه ،، الين صحيت تماماً وجلست ربع ساعة كذا بعدين رجعت نمت مرة ثانية.::
أحد الأشخاص يقول أنه كان في مخيم بالبر ،، فـ شاف عجوز رمادية اللون غريبة الشكل تدخل خيمة خويه .. مو هنا المشكلة .. المشكلة انها مادخلت من باب الخيمة
بل من خلال الخيمة نفسها وكأنها شفافة .. واليوم الثاني قال له خويه أنه بالليل حس بإمرأة رمادية جلست عليه ومنعته من الحركة والكلام وكانت تعصره وبعد شوي تلاشت واختفت تماماً .. ما يحتاج اقول لكم ان المخيم انعفس فوق تحت يوم دروا بالسالفة وصاروا ماعاد يطلعون بالليل خارج المخيم الا اثنين اثنين.::
حادثة أخرى صارت لواحد من الإخوان وكتب عنها .. وهي أنه كان راجع من العمل منهك فنام على السرير الساعة 12 الظهر تقريباً ، وقريب العشاء شاف إمرأة جوا غرفته وطبعاً الظلام دامس والباب كان مسكر فاستغرب شلون جت ولما قربت حاول يقوم او يتكلم وما قدر ، فقربت منه حتى جت فوق السرير وتمددت عليه بحيث دخل نص جسمها في جسده ، وضغطت بقوة بحيث كان يحاول يسوي شي ما قدر .. وبعد شوي طلعت من جسمه وابتعدت حتى تلاشت
::
في نهاية الموضوع حبيت أذكر بس انه من اهم اسباب الجاثوم .. النوم الملخبط ، والانهاك ، كذلك انك تنام على ظهرك خصوصاً ورجولك متباعدة (مفحج رجولك)
فالافضل النوم على الجنب الايمن ، برضو كثرة التفكير بهالموضوع قبل النوم تخليه يجيك .. وهذي حقيقة .. اخر نقطة هي انه الاكثار من الاذكار .. قراءة آية الكرسي والمعوذات قبل النوم تقي إن شاء الله بشكل كبير من الجاثوم.إذا أعجبكم الموضوع راح أكتب البلوق الجاي عن ظاهرة ميتافيزيقية جديدة وهي (الأبعاد غير المحسوسة) وعلاقتها بـ(الثقوب السوداء) .. وتحياتي لكم 23 February وأخيراً عاد لي سبيسييقول المثل (ماتعرف قديري ليما تجرب غيري) وفعلاً ما تحس بقيمة الشي الا اذا فقدته
وهذا الشي اللي صار لي مع سبيسي ,, يعني على كثر مواقعي اللي أشرف عليها واشارك فيها بس ما هان علي سبيسي حبيبي حشاشة يوفي (يوفي ولا ميلان)
الله يهديهم ميكروسوفت يعني ما لقوا الا سبيسي يخربونه ويقفلونه .. بس الشي اللي يغبن اني ما عرفت وش المشكلة الا عقب ما حذفت سبيسي وانشئت سبيس جديد، بعد ماخذت باك اب طبعاً ..
عموماً عشان ادري ان كثير صارت لهم المشكلة اللي هي باختصار، لما تدخل سبيسك يهنق وتضطر تقفل الاكسبلورر ، راح اكتب هنا طريقة الحل
اول شي من المسنجر اضغط على الصورة اللي جنب اسمك راح تطلع لك معلومات السبيس .. اضغط على Add Blog Entry اللي توديك على صفحة إضافة بلوق جديد ولا راح يهنق معك، اوكي الحين كليك على Profile واعمل Delete My Profile راح يقول هل انت متأكد انك تبي تحذف البروفايل قل اوكي .. واذا حذف البروفايل ارجع سو بروفايل جديد بس انتبه لا تحط الا صورة واسم لك بس .. بقية المعلومات لو رجعت دخلتها راح يهنق اقين اند اقين، وبكذا تكون حليت المشكلة.
اتمنى من كل اللي يعرفون سبيسي يغيرون الرابط اللي عندهم الى هالرابط حق سبيسي الجديد:
يعني بدل kingahat زود شرطة وخله king-ahat
وعلى دروب الحب نلتقي
 آهــات 21 February عيد أضحى مبارككيفكم ياحلوين
اليوم عيد قسم بالله <<< بشر امك طيب
 عاد بهالمناسبة الحلوة قلت لازم اقدم لزوار ومحبي سبيسي المصون هدية محترمة
 .. صح ان عدد المعجبين في سبيسي كثر عدد معجبات مزعل فرحان وخالد الليمون  بس اني لازم ارضيهم لذا فكرت في احلى هدية لهم بالعيد وقلت لازم اتميز عن السبيسات الثانية ..يعني السبيسات الثانية المفلسة والكئيبة << الفقها بس .. يحطون لكم ورود وخرابيط ومدري وش .. اما مع سبيس آهات فتجدون المتعة والفائدة << حروف وأفكار
لذا قررت أعطيكم اعظم هدية ممكن يهديها لكم شخص/شخصة في العيد ...
.
.
.
.
 حلاو بقر
لالالا مايصير كذا تتطاقون .. بالدور .. كل واحد له حلاو بس معليش بعضها يابسة شوي عاد ان تمصعت ضروسك مالي شغل .. اهم شي انتبهوا ترا بعضها يكون التوفي مع الحلاو مايعات وناشبات في القرطاسة .. انتبهوا اعزائي لا تاكلون القراطيس ترا ياما عورتنا بطوننا وحنا صغار منها .. وشكراً
كل عام وانتم بخير |
|||||||||
|
|
